Agid per confamigliars e per persunas spezialisadas
Tge pos ti far concretamain, sche ti has in suspect u sche ti sas, ch'insatgi en tia vischinanza, en tes circul d'enconuschents ed en tes ravugl d'amis u en tia famiglia è en ina relaziun toxica, experimentescha violenza a chasa u ch'i vegn pratitgà violenza a chasa?
En situaziuns acutas
En situaziuns acutas (culps, objects che rumpan, uffants che bragian) èsi impurtant da clamar la polizia (117) per franar la violenza. Telefona en cas da dubi pli gugent ina giada da memia ch'ina giada damain a la polizia. A medem temp èsi impurtant da ta proteger sez e da na betg ta metter en privel.
Nagin privel immediat
Sche la violenza na capita betg immediatamain, pos ti ta laschar dapli temp. Ti na stos betg ta precipitar.
Igl è impurtant che ti taidlas tes sentiment intern, sche ti has in suspect.
T'adressescha a la persuna pertutgada da violenza. Fa attenziun, che ti sajas persula u persul cun la persuna.
Exprima tes quitads per la persuna. Taidla la persuna senza valitar.
Dumonda la persuna, tge sustegn ch'ella giavischa. Propona in agid concret, senza far pressiun. Ti pos per exempel telefonar ensemen cun ella al Post da cussegliaziun per l'agid a victimas u ta cunvegnir cun ella, co che ti pos gidar en ina situaziun acuta.
Va per cussegliaziun tar l'Agid a victimas, sche ti n'es betg segira u segir, co che ti duais ir enturn cun questa situaziun. L'Agid a victimas gida er persunas d'ordaifer. Sche ti vuls, pos ti descriver la situaziun en moda anonima. Las collavuraturas ed ils collavuraturs èn suttamess a l'obligaziun da discreziun.
Hajas pazienza, i dovra temp, curaschi e forza per sa deliberar d'ina relaziun violenta.
Persunas spezialisadas
Persunas spezialisadas encuraschain nus da sa laschar cussegliar tar il Post da cussegliaziun per l'agid a victimas, sch'ellas èn confruntadas a la lavur cun cas da violenza a chasa. Sche Vus avais interess da frequentar furmaziuns supplementaras, renviain nus a la purschida da la Bildungsstelle Häusliche Gewalt .