Vivas ti en ina relaziun toxica?

Ta di tia partenaria u tes partenari, che ti n'hajas nagina valur?
Vegns ti cuntinuadamain controllada u controllà – nua che ti es, cun tgi che ti ta scuntras, cura che ti vegns a chasa?
Es ti victima d'ina schigliusia exagerada?
Smanatscha ella u el da ta bandunar, sche ti na fas betg, quai che ta vegn ditg?
as ti quitads per insatgi che viva en ina relaziun toxica?
Manipuleschas ti tia partenaria u tes partenari?

La violenza a chasa na cumenza betg pir cun in egl blau, mabain savens gia bler pli baud e senza blessuras visiblas. Ella cumenza savens en moda subtila e latenta. Ti vegns controllada u controllà ubain umiliada u umilià permanentamain u ta vegn smanatschà.

Ti has il sentiment ch'insatge na constat betg, n'es dentant betg segira u segir, sche ti vivas en ina relaziun toxica?

Sche tut vegn memia bler per tai, va per agid.

Toxic Love

Tge è Toxic Love?

Ins discurra da relaziuns toxicas, cunzunt sch'i vegn applitgà en in partenadi violenza psichica sco controlla, gronda schigliusia, manipulaziun. I po dentant er dar en relaziuns toxicas violenza fisica.
Quest questiunari ta gida a valitar, sche tia relaziun è toxica u sauna: Questiunari (with-you.ch).

Tge è violenza psichica?

Violenza psichica – u er communicativa – signifitga duvrar meds verbals per dominar, per controllar, per umiliar u per blessar emoziunalmain insatgi. Quest gener da violenza maina ad ina dissoluziun da la conscienza da sasez ed ad ina isolaziun da la victima. Communicaziun è in factur impurtant per ina relaziun sauna. Violenza communicativa è in indizi per ina relaziun toxica che na funcziuna betg.

Per persunas d'ordaifer poi esser difficil da chapir, pertge che persunas pertutgadas restan en ina relaziun toxica. Ils motivs persuenter èn multifars: Intimidaziun, in sentiment da nunpussanza, in desideri da «buns temps», empermischuns da sa meglierar, dependenza finanziala u uffants cuminaivels.

Tge è violenza a chasa?

Violenza a chasa è la noziun generala, sch'i sa tracta da violenza en in partenadi actual u schlià, ma er da violenza entaifer la famiglia. Quai, er sch'il pèr u la famiglia viva separadamain. La gronda part da violenza a chasa sa mussa entaifer il partenadi. En famiglias ha la violenza tranter partenaris consequenzas directas sin ils uffants ch'experimenteschan la violenza directamain u indirectamain.

La violenza a chasa ha bleras fassettas e po cumparair en differentas furmas e constellaziuns:

Violenza psichica: Offensiuns, intimidaziuns, sbragidas, reducziuns da la valur, umiliaziuns, crear sentiments da culpa, cumportament schiglius, restricziuns da la vita sociala, scumond u controlla da contacts da famiglia u da contacts cun il mund ordaifer la famiglia, avair experimentà violenza a chasa en la chasa dals geniturs
Violenza economica: Scumond da lavurar, sforz da lavurar, controlla finanziala, sequestraziun dal salari, explotaziun finanziala d'ina persuna
Violenza corporala: Dar schleppas, stuschar, zappar, morder, sgriflar, bittar suenter chaussas, pugnadas, stranglar, arder
Violenza sexualisada: Vegnir memia datiers en moda importuna, remartgas sexualas indecentas, contacts corporals betg giavischads, bitschs, mulestas, spogliar, mussar maletgs e films pornografics, sforz ad acts sexuals, violaziun empruvada u exequida
Stalking: Mulestar repetitivamain, suandar ina persuna u guettar

012345

50 % dals cas capitan en partenadis.

012

012345

L'onn 2023 èn 25 persunas vegnidas mazzadas pervia da violenza a chasa, 20 da quellas eran femininas.

0123456789

012345678

L'onn 2023 hai dà bunamain 20 000 delicts da violenza a chasa.

#STOPVIOLENZAACHASA

Charezza è confidenza, betg surveglianza

Sche ti vegns controllà u surveglià cuntinuadamain da tia partenaria u da tes partenari, po quai esser in indizi da violenza psichica u d'ina relaziun toxica. Latiers tutgan remartgas sco:

«Trametta a mai tia posiziun, jau vi savair, nua che ti es.»

«Jau na vi betg, che ti ta scuntras cun tia famiglia.»

«Ti na vas betg en sortida senza mai!»

Surveglianza sa mussa per exempel tras quai, che tia partenaria u tes partenari controlla savens tes telefons e tes messadis, cumpara nunvulidamain insanua, ta scumonda tes hobis u na ta lascha betg pli bandunar la chasa.

Quai ta fa dependenta u dependent da questa persuna e po chaschunar, che ti vegns isolada u isolà socialmain e na vesas strusch u insumma betg pli tia famiglia e tes amis. Ti pos uschia er perder tia conscienza da sasez e la controlla da tia vita.

Sche ti badas, che tia relaziun n'è betg sauna – pia toxica: Ta lascha cussegliar gratuitamain ed en moda anonima tar l'Agid a victimas u tar in post da cussegliaziun spezialisà. Là lavuran persunas spezialisadas che ta dattan in'opiniun spezialisada sco er ina perspectiva externa sin tia situaziun e ta mussan, tge opziuns d'agir concretas che ti has.

Perquai che charezza è confidenza, betg surveglianza.

Charezza è sustegn, betg suppressiun.

Relaziuns toxicas pon sa distinguer tras suppressiun sco er tras la mancanza da stima e da sustegn. Sche tia partenaria u tes partenari ta svalitescha, umiliescha u permalescha regularmain. Quest process po capitar en moda latenta.

Signals d'avertiment èn, sche ti audas da tia partenaria u da tes partenari savens frasas sco:

«Ti na sas nagut.»

«Senza mai na fissas ti nagut.»

«Ti battas.»

«Co pon ins mo esser uschè tup.»

«Datti insatge che ti sas?»

Igl è impurtant da retschertgar ils signals d'avertiment, sche ti badas, che tia partenaria u tes partenari ta svalitescha e ta fa pitschna u pitschen.

Forsa pensas schizunt, che ti meritas da vegnir tractada u tractà uschia. Forsa tschertgas ti stgisas per il cumportament toxic da tia partenaria u da tes partenari. I na gioga nagina rolla, pertge che la persuna ha sviluppà musters da cumportament toxics. Ella sto surpigliar la responsabladad.

Ina cussegliaziun tras ina persuna spezialisada po ta dar dapli clerezza ed ina perspectiva davart tia situaziun. Sche ti has in sentiment dischagreabel, en tge direcziun che tia relaziun è sa sviluppada, ta cusseglian nus, da ta laschar cussegliar gratuitamain ed en moda anonima tar l'Agid a victimas u tar in post da cussegliaziun spezialisà.

Perquai che charezza è sustegn, betg suppressiun.

Charezza è respect, betg squitsch.

Squitsch è ina furma da violenza psichica che exista regularmain en relaziuns toxicas.

Squitsch po sa far valair tras expressiuns sco per exempel:

«Sche ti vas ussa or da porta, na ma vesas ti mai pli.»

«Sche ti ma bandunas, met jau maun vi da mamez.»

«Sche ti ta separas, na vesas ti mai pli ils uffants.»

En tals muments èsi impurtant da na betg tschertgar la culpa tar tatez. Perquai che n'importa betg tge che ha chaschunà, che tia partenaria u tes partenari è enervà, desperà u grit, na giustifitgescha quai mai expressiuns da squitsch.

Savens engrevgeschan expressiuns da squitsch la separaziun, pervia da la tema, che las smanatschas vegnian realisadas. En situaziuns talmain engrevgiantas po l'Agid a victimas u in post da cussegliaziun spezialisà gidar cun sias enconuschientschas spezialisadas e tschertgar ensemen cun tai vias or da questa situaziun.

Perquai che charezza è respect, betg squitsch.